Wanawake Mtwara-Mikindani Watakiwa Kujitokeza Kupima saratani ya Mlango wa Kizazi

Posted on: August 5th, 2021

Wanawake wa Manispaa ya Mtwara Mikindani wametakiwa kujitokeza kwa wingi kupata huduma ya uchunguzi wa Saratani ya kizazi inayofanyika katika Kituo cha Afya Likombe kuanzia Agosti 5-7,2021,   ili kupata matibabu mapema pale zitakapobainika  dalili za ugonjwa huo.

Hayo yamesemwa na Kaimu Mganga Mkuu wa Mkoa wa Mtwara Dkt.  Kodi Mohamedi Agosti 5, 2021 wakati wa kuhitimisha mafunzo ya nadharia kwa wahudumu wa Afya watakaotoa huduma hiyo katika Mkoa wa Mtwara.

“Huduma hii ni bure, niwaombe wanawake jitokezeni kwa wingi ili kupata huduma hii na wale watakao bainika kuwa na tatizo aweze kupata matibabu mapema” Amesema Kodi

Ameendelea kusema  kuwa aina hii ya saratani inawapata wanawake  wenye  miaka kati ya  30 hadi 50,  wengi wao hawana uelewa wa kutosha  juu ya ugonjwa huu   hii inapelekea wengi wao kuchelewa kupata matibabu  na kuleta  athari zaidi baadae.

Naye Meneja kitengo cha Uchunguzi wa Saratani na Elimu kwa Umma  kutoka katika Taasisi ya Saratani Ocean Road, Dkt. Maguwa Stephano ameishukuru Bank ya NBC kwa  kuratibu zoezi hili, kwa kufanya hivyo Mkoa wa  Mtwara umepanua  wigo wa kutoa  huduma ya uchunguzi wa Saratani ya Mlango wa kizazi  kutoka vituo 22 hadi kufikia 41.

Kwakuwa Saratani ya mlango wa kizazi inaongoza  kwa kuathiri wanawake wa Mkoa wa Mtwara,  Manager wa Bank ya NBC - Mtwara Bw. Emmanuel Mseti  amewataka wauguzi  hao kutumia elimu hiyo    kutatua changamoto hii ya  saratani  katika  Mkoa wa Mtwara.