"Natoa Miezi Mitatu Kila mmoja awe amejiandikisha kwenye Daftari la Wakazi" RC BYAKANWA

Posted on: January 20th, 2018

Mkuu wa Mkoa wa Mtwara Mhe: Gelasius G. Byakanwa akizindua zoezi la Uandikishaji Daftari la Wakazi Kimkoa lililofanyika kwenye Viwanja vya Ofisi  ya Kata Shangani

Mkuu wa Mkoa wa Mtwara Mhe: Gelasius Byakanwa ametoa muda wa miezi mitatu kwa wakazi wa Mkoa wa Mtwara  kujiandikisha  kwenye daftari la wakazi lililopo kwenye kila Mtaa.

Amesema kuwa kama muda huo utapita na mwananchi hajajiandikisha  kwenye daftari hilo  hatatoa adhabu yeyote, badala yake mwananchi atakosa huduma mbalimbali kutoka kwenye Ofisi za Serikali ikiwemo barua za utambulisho zinazotakiwa kwenye mabenki na huduma zingine..

Byakanwa amezungumza hayo leo wakati wa uzinduzi wa zoezi la Uandikishaji kwenye daftari la wakazi Kimkoa  lililofanyika kwenye Viwanja vya Ofisi ya Kata Shangani  Manispaa Mtwara-Mikindani. Aidha amewataka watendaji kutomkaribisha mgeni yeyote kwenye Mtaa kama hana taarifa za kujiandikisha kwenye mtaa alikotokea.

Amesitiza kuwa ili kuendelea kulinda amanii, utulivu  na kuondoa uhalifu  kwenye maeneo yao ni lazima wananchi wakafahamiana kwa kujiandikisha kwenye daftari la wakazi linalomilikiwa na Mtendaji wa Mtaa. Pia ameagiza mtu yeyote anapohamia kwenye  mtaa ni lazima ajiandikishe kwenye daftari hilo ili taarifa zake zingizwe.

Mkuu huyo wa Mkoa amezitaja faida zitokanazo na wananchi kujiandikisha kwenye daftari la wakazi  kuwa ni pamoja na kusaidia Serikali  kupanga bajeti ,mahitaji ,na huduma za jamii kwa watu wake kwa kuwa takwimu za idadi ya watu waliopo kwenye mitaa, kata, tarafa, wilaya, mkoa hadi Taifa  zitakuwepo. Faida zingine ni pamoja na kuimarisha Ulinzi na Usalama.

Kwa upande wake Mkurugenzi wa Manispaa Mtwara-Mikindani Bi Beatrice Dominic amesema kuwa kutokana na uelewa mdogo wa wananchi juu ya zoezi hili, imepelekea idadi ya waliosajiliwa  kwenye daftari la wakazi kwa Manispaa kuwa ndogo na kufikia watu  46,704 Kati ya Wakazi 115,114 wanaokadiriwa kuwepo kwenye Manispaa. Aidha amesema kuwa anatarajia  baada ya uzinduzi huo wananchi watatimiza wajibu wao kwa kujiandikisha kwenye daftari hilo.

Ameongeza kuwa Daftari hilo litatunzwa na Mwenyekiti wa Mtaa husika na kwamba Mwenyekiti atapaswa kujaza fomu kila  taarifa mpya zinapojitokeza zikiwemo vizazi,Vifo, kuhama na kuhamia. Aidha kazi za Mtendaji wa Mtaa ni kuhakikisha daftari linaingizwa Taarifa, linatunzwa na linatumika.

Daftari la wakazi lipo kisheria chini ya  sheria ya Serikali za Mitaa Na. 6  ya mwaka 1982, na limechapishwa na Waziri wa Nchi Ofisi ya Rais-TAMISEMI mwaka 2011.